Молитвы ко Христу, Сыну Божиему, взятые из Святого Евангелия.

  1. Молитва, взятая из притчи о сеющем семя (Мф.13:3-8)
  «Сыне Божий, Иисусе Христе, явивыйся во смиренной нашей плоти на земли, и посеявый доброе веры семя на селе мира сего! Огради страхом Твоим сердце мое, да не приходя лукавый восхищает посеянное Слова Твоего семя, и очисти сердце мое от терний печали века сего, лести, богатства и всякия суеты, и сотвори тое доброю землею к приятию Божественного Твоего Слова, да сотворю плод веры и имею часть со избранными Твоими, иже плод приносят Тебе ово сто, ово шестьдесят, ово тридесять, — яко благословен еси со Отцем и Святым Твоим Духом вовеки, аминь».

  2. Молитва, взятая из истории о хананеянке (Мф.15:22-28)
  «Помилуй мя, Господи Сыне Божий, Сыне Давидов по плоти, якоже помиловал еси хананею: душа моя зле беснуется гневом, яростию, похотию злою и прочиими пагубными страстьми. Господи! Помози мне, вопию Тебе, не на земли ходящему, но одесную Отца на небесех седящему. Ей, Господи! Даждь мне сердце верою и любовию последовати Твоему смирению, благости, кротости и долготерпению, да и в вечном Твоем царствии сподоблюся причащатися трапезы рабов Твоих, ихже избрал еси. Аминь».

  3. Молитва подвергающегося разным искушениям, взятая из истории о бедствующих на море апостолах (Мф.8:23-27)
  «Господи! Спаси мя, погибаю. Се бо кораблец мой бедствует от искушения волн и близ потопления есть. Ты, яко Бог милосерд и сострадателен немощем нашим, властию Твоею всесильною запрети волнению бедствий, хотящих погрузити мя и низвести во глубину зол, — и будет тишина, яко «ветры и море послушают Тебе». Аминь».

  4. Молитва, взятая из истории о Преображении (Мф.17:1-9)
  «Собезначальный Отцу и Духу Слове, нас ради, человек, и нашего ради спасения от Девы родивыйся и на земли поживый! Сподоби мя вкусити благости Твоея, которую святые Твои, любящии и почитающии Тя, и ныне вкушают, странствующе в плачевной мира сего юдоли, — и зрети присносущный свет Твой умным оком, егоже святым Твоим учеником показал еси в Преображении святейшия Плоти Твоея, да, ныне верою зря, потом лицем к лицу сподоблюся видети славу Твою, и со избранными Твоими хвалити Тя и Безначального Твоего Отца и Святаго Духа. Аминь».

  5. Молитва, взятая из истории о прокаженных (Лк.17:12-19)
  «Иисусе, Врачу душ и телес наших, помилуй мя! К Тебе, живущему на небесех и на нас, смиренных, призирающему, возношу от земли глас мой с воздыханием и верою: очисти мою душу, прокаженную грехами, якоже очистил еси десять прокаженных мужей, даявлюся чист пред святейшими очесами Твоими, егда приидеши во славе Твоей, и имею часть со избранными Твоими и с ними восхвалю Тя со Безначальным Твоим Отцем и Пресвятым Духом во царствии Твоем. Аминь».

  6. Молитва, взятая из истории о слепцах (Мф.20: 30-34)
  «Сыне Божий, Свете вечный, и даяй всем свет! Помилуй мя, просвети очи сердца моего, мглою грехов и страстей омраченная, якоже просветил еси слепых, возопивших к Тебе. Да отверзутся и мои очи сердечная, да узрю Тя, Света незаходимаго, и верою и любовию последую Тебе, мене ради, окаяннаго, ходившему по земли. Аминь».

  7. Молитва, взятая из разных историй
  «Иисусе Христе, Сыне Божий! Призри на мя, якоже призрел еси на грешницу в дому Симонове, на Петра, отвергшагося Тебе, на разбойника на кресте, и сопричти мя покаявшимся Тебе мытарем, блудником и прочиим грешником, яко Ты еси Бог и Спас наш, пришедый в мир грешники спасти, от нихже первый есмь аз. Аминь».

  8. Молитва о возобновлении духовном
  «Иисусе Сыне Божий, Спасителю и Обновителю мира, злобою греховною обветшавшаго! Обнови мене благодатию Животворящаго Духа Твоего. Дай мне ум разумети силу спасительнаго пришествия Твоего. Дай мне сердце любити Тя — вечную любовь, утешение и радость святых. Дай мне очи непрестанно зрети страсти Твоя. Дай мне уши слышати святое Слово Твое. Дай мне уста глаголати Тебе угодная, мне и ближнему полезная. Дай мне нозе ходити по стези заповедей Твоих; и все мое, молю Тя, отъими, и подаждь Свое; возми ветхое, и подай новое все, яко Ты еси творяй вся, и без Тебе «не можем творити ничесоже» (1 Ин 15:5), яко благословен еси во веки. Аминь».

  Так можешь, возлюбленный христианин, читая святое Евангелие и прочее Писание, возводить ум и сердце свое верой к Богу и милости от Него искать. Таких умилительных молитв много имеется среди церковных песен и ирмосов святого Иоанна Дамаскина. Стоя в Церкви и прилежно внимая чтению, к себе их прилагай и с верою душе своей ищи пользы. И хорошо знай, что без прилежной молитвы всякое старание, тем более в духовном, тщетно бывает.